Adolf Hitler

Adolf Hitler (Braunau, Austria-Hungaria, 1889ko apirilaren 20an jaio zen eta hil, Berlin, Alemania, 1945eko apirilaren 30a), austriar jatorriko alemaniar diktadorea izan zen, nazionalsozialismo (edo Nazismo) izeneko ideologiaren sortzaile eta bultzatzaile nagusia. Jarraitzaileek Der Führer deitzen zuten Hitler-i, hau da, buruzagi edo gidaria.

 
Hamarka milioi heriotz eragin zituzten gerra eta gizadiaren aurkako krimenen erruduna izan zen, tartean holokaustoarena.

Nekazari eta funtzionario apalez osaturiko familia katoliko batean sortu zen.

1905ean Vienara joan zen artea ikasteko asmotan. Vienako Arte Ederretako Akademian bi aldiz porrot egin (1907-1908) eta ama hil ondoren (1908ko abendua), bost urte eman zituen bizimodua ateratzeko lan xumeak eginez.

1914ko gerra-aldarrikapena bozkarioz harturik, Bavariako armadan sartu zen. Bi aldiz larriki zauritua izan zen eta kaporal gradua eman zioten. Gerran izandako jokabide adoretsuagatik burdinazko gurutzea irabazi zuen, ofizialak ez zirenei bakan baizik ematen ez zitzaien saria. Gerra amaiturik, armadaren politika hezitzaile gisa jardun zuen.

1919an Langileen Alderdi Alemana izeneko eskuin muturreko taldearekin harremanetan jarri zen. 1921ean Röhm kapitainaren laguntzarekin alderdiko lehendakari bihurtu zen, eta izena aldatu: Alemaniako Langile Alderdi Nazionalsozialista sortua zen. Bavarian abertzalekeriazko demagogia erabiliz nahikoa entzutea lortu zuen. Aldi berean, alderdiko erakunde paramilitarrak, SA (Sturm Abteilung edo Eraso Saila) deiturikoak izua hedatzen zuen aurkari politikoen artean.

Landsberg kartzelan emandako urtebetean, gerora nazionalsozialismoaren ideologiaren adierazle nagusia izango zen Mein Kampf (Nire borroka) obra idatzi zuen. Kartzelatik irten ondoren, alderdia antolatzeari ekin zion eta itxuraz politika moderatuagoa egin zuen. Aldi berean, zenbait industria gizonekin harremanetan hasi zen. Izan ere, 1924-1929 bitarteko urte oparoetan Alemanian ez zen Hitlerrenak ziren bezalako muturreko ideietarako leku handirik izan. 1929ko krisi ekonomikoak eragindako milioika langabetu etsiek, ordea, indar berria eman zioten alderdiari: 1928an 12 diputatu izatetik 107 izatera pasa zen 1930ean.

1932ko urtarrilean Hitler lehendakaritzarako hautagai izan zen.

1933ko martxoan, muga gabeko aginpidea jaso zuen diputatuengandik; apirilean, Gestapo izeneko polizia politikoa sortu zuen; arraza-garbiketa programari ekin zion, juduak kontzentrazio-esparruetan sartu zituen; ekainean, alderdi nazionalsozialista alderdi bakartzat aldarrikatua izan zen.

1934ko ekainaren 30an, Labana luzeen gaua deiturikoan, eskuineko aurkariak hilarazi zituen: alderdikoak (Ernst Röhm eta gainerako SAko buruzagiak, Gregor Strasser) eta alderdikoak ez zirenak (Kurt von Schleicher, Gustav von Kahr, etab.). 1934ko abuztuan, Hindenburgen heriotzaren ondorengo hauteskundeetan, alemaniarren % 90ek baietza eman zioten Hitler lehendakari eta kantzeler izendatzeari. Harrezkero Führer (buruzagi, aitzindari) deitura harturik, bere Ordena Berria ezartzeari ekin zion, gazteria, irakaskuntza, kultura eta langileria, guztiak bere mende zeuden erakundeetan antolaturik. Langabeziaren auzia armagintza eta lan publikoen bidez konpondurik, alemaniar herria bere alde jarri zuen.

Bizi-eremuaren dotrinari jarraiki, Hitlerrek alemanez mintzo ziren herrialde guztiak batu nahi izan zituen. 1938ko martxoaren 15ean, Alemaniako tropak Austrian sartu ziren, eta Anschluss delakoa (atxikitzea, Alemaniarekin bat egitea, alegia) aldarrikatu zuten. 1938ko irailaren 30ean, Txekoslovakiako alemaniar minoria aitzakiatzat harturik, herrialde haren laurdena eman zitzaion Municheko Konferentziaren arabera. Gero, 1939ko martxoaren 15ean, Bohemia eta Moravia inbaditu zituen.

Bigarren mundu gerraren hasiera. 1939ko irailaren 1ean Polonia inbaditu zuenean, Frantziak eta Erresuma Batuak gerra deklaratu zioten Alemaniari. Bost astean Frantzia menderatu zuen Alemaniak, tximista-gerra izenez ezagutu zen taktika militarraz baliatuz.

Hainbat eraikuntza egiteko agindu zuen Hitler-ek, adibide batzuk hauek dira: Estadio Olinpikoa, La Guarida del Lobo, El Nido del Aguila etab.

Hitler lurrade asko inbaditzea lortu zuen, baina errusiarren kontra borrokatzen hasi zanean, beste lurraldeak alemaniaren kontra borrokatzaen ari zirela kontuan artuz eta alemaniaren aliatuek ezin zutela ezer egin laguntzeko, galtzan hasi zen (alemaniak bigarren mundo gerra galdu zuten arte).

Hitlerrek azken egunak bere jauregiaren azpian berariaz eraiki zioten bunker erraldoian eman zituen, alemaniarrek bonbardaketa amaigabeak pairatu behar zituzten bitartean. Hitlerrek ez zuen inolako kapitulaziorik onartu. 
Horren ordez lur errearen estrategia agindu zuen. Sobietarrak ingururatzen ari zitzaizkiola, bere buruaz beste egin zuen, Eva Braun emaztearekin batera. Hil aurretik, agindu zorrotzak eman zizkien hurbileko menpekoei hilotza erabat errauts zezaten.